مراحل إختيار العميل سوف يمر بهم أي فريلانسر في مجال التسويق الالكتروني

الطبيعي ان العميل هو اللى بيدور على شركة سيو أو تسويق الكتروني يتعاقد معاها، بس اللى لازم تفهمه انك انت كمان ليك دور كبير في إختيار العميل ، وضروري حتمر بمراحل كتير قبل ما توصل للمرحلة دي.

سبعة مراحل لـ إختيار العميل سوف يمر بهم أي فريلانسر أو مسوق الكتروني تقودك من البداية وحتي الوصول الي الاحتراف. قام بمشاركتها الأستاذ حسام الدين من خلال موقع سيو ايرا وأعجبتني طريقته في العرض فقمت بمشاركتها معكم مع ذكر المصدر.


[ إختيار العميل ]

(1) أي عميل والسلام :

المرحلة دى بتكون فى بداياتك كشخص او كشركة تسويق الكتروني و سيو بتشتغل وبتدور على عملاء جدد، واول ما يجي عميل هتفرح وتشتغلة وانت ونصيبك ، وغالباً بتموت نفسك وبتدى وقت كتير جدا علشان توصل لنتائج كويسة جدا وترضى العميل، مش عاوز تضيعه، عاوز تحافظ علية ، بس للأسف المرحلة دى بتبقي صعبة جدا والكل لازم يمر بيها، ودا بيخليك كشركة تقبل مواقع ومنتديات ضعيفة كحجم وفلوس مقارنة بالمجهود اللى بتعملة بس نصيحة مني، استحمل شوية لان المرحلة دى هتتعلم منها كتير جدا ، ومن المرحلة دي هتقدر تخليك تفهم طبيعة كل عميل وتوصلك لمستوي احترافي في إختيار العميل اللي حيكمل معاك.


(2) فلترة العملاء :

وهنا هتوصل بعد وقت معين بقى معاك عملاء كويسيين ، انك تلاقي نفسك بتضيع وقتك ومجهودك فى مواقع ضعيفة المستوي ومنتديات مجانية وغيرها، وهيبقي صعب عليك تسيب المواقع والشركات دى بسبب اتفاقك معاهم والمصداقية ودا صح جدا ، لانك وافقت تشتغل من البداية ، فا لازم تكمل معاه.

بس هتاخد بالك بعد كده في إختيار العميل وتركز مع كل عميل هيطلب منك تشتغلة، ومش هتقبل عملاء انت حاسس انهم مش هيوصلوك لهدفك، دا مش تكبر على العملاء، بالعكس دا مصداقية معاهم ، لانك لو اخطأت وقبلتهم فى المرحلة دى مش هتقدر تديهم وقت ومجهود زى زمان لان فى عملاء غيرهم اهم “وبيدفعوا اكتر” ، فمن الطبيعي انك وبدون قصد هتقصر فى شغلك معاهم يا اما هتضيع العميل الجديد والعميل القديم وهتلاقي نفسك تايه.


(3) مرحلة الحلم :

وهنا هيحصل ان حلمك بأنك تكبر قرب يتحقق، لما تعمل Deal مع عميل او موقع معروف شوية ، وهنا النفس البشرية هتشتغل ، واستحالة هتقبل منتديات او مواقع مجانية او ضعيفة لان عندك الاهم ، هتقع فى مشكلة لازم تاخد بالك منها، انك هتقصر برضة مع العملاء اللى وصلتلهم فى المرحلة التانية، مع ان ممكن العميل الجديد وال Deal الجديد مش كبير مادياً ، دا ممكن من فرحتك تقول “دا انا لو اشتغلت ببلاش للموقع دا انا الكسبان” ، والصراحة فعلا هتكون كسبان لان هتحط فى صفحة عملائك عميل معروف الى حد ما ، ركز مع العميل دا وحاول تحولة من موقع او شركة معروفة شوية لموقع وشركة معروفة جدا واحسن حد فى مجالها ، لان بكده هتكبروا سوا.


(4) العميل لما كبرتة ، كبر عليك :

دا من حقة على فكرة، من حقة انه يكبر اكتر وانه بقى شركة كبيرة، وهيبتدي ساعتها العميل دا يدور على شركة اكبر منك او يعمل الصح …. يجيب فريق عمل ويعمل قسم داخل شركتة للسيو والتسويق الالكتروني ، ويعين 3 شباب عندة فى الشركة يشتغلوا على موقعه بس، مهو هيحسبها، هو بيدفع ليك كام وبياخد ايه، ولو جاب 3 موظفين هياخدوا كام ويعملوا ايه، ولو هو ذكي هيعمل كده فعلا.

انت هنا لازم تكون اذكي، واكيد وصلت للمرحلة الرابعه بعد ما مر عليك خبرات كتير وقدرت تفهم عملاء كتير، وهتقدر تحس بخبرتك ان العميل دا بدأ يفكر فى الموضوع دا …… فا انت تعمل ايه ؟؟ اعرض علية انت الموضوع ،،،، ايوة ،،،، قولة جيب ناس تشتغل معانا من عندك فى الشركة علشان نكبر الدنيا اكتر ، وان مع الوقت هيدونا شغل اكتر من اللى بنعملة دلوقتى ،، طبعاً هيستغرب ويقول انك عاوز تسيبة بس بطريقة لطيفة ،،،، انت بقى خلى دماغك شغالة وفى نفس الوقت قولة علشان ماتدفعش كتير جيب ناس متخرجة وعندها طاقة وانا هعلمهملك لحد ما يقفوا على رجليهم ،،، صدقني هتسيبوا بعض وانت مبسوط وحبايب طول الوقت ، وطبعا مش هتكون زعلان انه هيسيبك اوي ، لان هيكون عندك اكتر من عميل فى نفس حجمة وبيدخلولك دخل كويس


(5) مرحلة الثبات :

هنا هتلاقي نفسك او تلاقي شركتك ثابتة، مش بتكبر ولا بتصغير، بتكبر فى فترات حاجة بسيطة ، وفى بعض الاوقات بيقابلك مشاكل ، ودى مرحلة مش سهلة ، وهتفضل تفكر كتير، وتحاول تدور على حاجة تخرجك من عنق الزجاجة


(6) انا فين ورايح فين :

وهنا لازم تراجع نفسك او شركتك ومستواها من اول ما بدات لحد يومك هذا ، وساعتها هتحس بطعم اللذة فى النجاح وهتحمد ربنا انك وصلت لمرحلة كويسة جدا ، اه تعبت كتير ، بس جابت نتيجة معاك ، ابدأ بقى ركز واستني الكبير


(7) الكبير :

توصل بيك المرحلة انك عاوز عميل تقيل ، عميل International ، هيبدأ يجيلك طلبات من شركات كبيرة ، وتجري علشان تخلص ال Deal وممكن ال Deal ما يكملش ، او ان ال Deal يكمل وتمضوا عقود ، بس يسيبوك لانك لسا مش جاهز ليهم ومش قادر تقدملهم اللى هما عاوزينة ، وطبعا اكيد العميل دا مش هيتعاقد غير مع شركة ، وانت لو وصلت للمرحلة اللى قبل دي من غير ما يكون عندك شركة ” تبقي بتهزر اصلا ” ، هتبتدي تتعلم ليه الشركات دى سابتك ، وايه نقط الضعف اللى عندك ؟ لازم تعالجها بسرعه ، علشان تحافظ على العميل الجديد اللى هايجيلك

فى المرحلة السادسة والسابعه ، هيجيلك طلبات من عملاء كتير جدا علشان تشتغلهم فى موقعهم ، ركز ، ايوة ركز اوي علشان ما توقعش نفسك ، هنا بقى لازم بعد ما العميل يختارك ويبعتلك طلب ، انك تختار اللى هتتعامل معاه وترفض التانيين بطريقة كويسة.

زر الذهاب إلى الأعلى
إغلاق